.*اضرب واهرب*
الجديد شنو!!!!؟؟؟؟
*** تقديم اسم الهلال على المريخ هو الحق والجمال . والنغم والموسيقى . والذوق وجميع المريخاب الرائعين ( بعفوية ) يفعلون ( وبعقلانيه ) يتصرفون فى هذا الاتجاه
*** لقاءات القمة او كما نسميها ( لقاء السحاب ) بالحق او فى ( الحقيقة ) او ( الغلاط ) هى . هى ان كانت فى الكرة او ( البلى ) او ( حرينا ) او ( ام قحيفات ) او ( لعبة الكراسى ) هى نفسها بكل تفاصيلها
*** اليوم الاربعاء يتجدد اللقاء وترتفع ( الحمى ) الصفراء ( والهلوسه ) الحمراء امام ( الصحة ) البيضاء ( والعافية ) الزرقاء وتوقعات الاستديوهات والمراقبين ( والعاقلين ) تقول الهلال ( سيكون ) كما كان بدامر المجذوب وما ادراك ما الدامر والهلال يبهدل فيها ابن عمه( ويمرمطه ) بضربات رباعية ( مامرقت ) منه والى يومنا هذا يعيش ( وجعها ) والامها ( تحنى ظهره ) وارجله ( لحقت كرعينى ) ولا اقول ( لحقت امات طه )
*** ساعات ويبدا اللقاء وينتهى . وقبله نقول لاحبابنا المريخاب . يعنى شنو لو غلبكم الهلال الليله !! والجديد شنو ؟؟ مش غلبكم كتير فى الصيف والخريف والشتاء؟؟ وفى رجب وشعبان وشوال وذى الحجه ؟؟ وفاز عليكم فى يناير وفبراير ومارس وابريل وحزيران وتشرين ونيسان وبرموده وكل شهور السنه الميلاديه والهجريه والقبطيه وجميع ايام الاسبوع
*** الجديد شنو لوغلبكم الهلال وهو غلبكم بشعاركم الاصفر ومرات بالاحمر وخليط لكم بالاحمر والاصفر وهو يرتدى الابيض الناصع او الازرق السماوى ولو ارادها ( بمرايل التمارين ) لفعل ولم يبالى ولاجديد وفوز الهلال عليكم ( عادى وعادل )
*** احبابنا الساده المريخاب باستثناء بعض هزائم استعملتم فيها ( الدراب ) ورميتم ( الطوب ) وقذفتهم فيها ( قوارير المياة ) فقد تحملتم انتصارات الهلال عليكم ( بصبر وجلد ) وياريت تتحملوا هزيمة اليوم بذات الصورة وفريقكم يجتهد للخروج ( باقل خسارة ) وليته يستطيع
*** احبابنا المريخاب نتفق معكم على بعد فريقكم وابتعاده من منصات التتويج نحزن انه ادخل فيكم الاحباطات ( وكرهكم الكورة ) نقدر لكم هذا ونحترم ( طموحكم وطمعكم ) واحلامكم وعشمكم ( عشم ابليس فى الجنه ) فى الفوز نحنرم كل هذا من منطلق احترامنا لند يستحق ( ومستحق ) للاحترام وكفى
*** ولا ولن نوصى لاعبى الهلال فهم يعرفون الواجب يعرفون ان الشعب السودانى عانى ويعانى من ويلات الحرب عانى اللجوء والنزوح والامراض وبعرفون انهم من بعد الله ( صناع الفرح ) لهذا الشعب الابى الجمبل وصناع الفرح عليهم اليوم انتاج ( ماركه جديده ) من ماركه ( الدامر الممتازة) الانتاج السابق الذى اسعد السودان واهله ( الا من ابى )
*** ختاما اجزم ان الساده المريخاب الرائعين ( والرائعين جدا ) جهزوا انفسهم ( للتهنئه والمباركه ) فهكذا عرفناهم بعد كل خسارة للمريخ العظيم وانتصار للهلال الاعظم
وما اجمل الشارع السودانى والازرق منتصر ومااجمل وابهى واروع وطنى السودان وسماؤه زرقاء زرقاء . زرقاء
ثلاثية الابعاد
عبد المنعم شجرابى
