عائشة الماجدي تكتب : الأبيض تتألم بصمت
الابيض عروس كردفان اللي كانت صٌرة السودان كله اصبحت هسي عطشانة ومتألمة ومحاصرة وأهلنا في الأبيض صابرين صبر أيوب
الان الواقع في الأبيض ك الاتي :
▪️ أزمة الموية: المدينة معتمدة اظن على مصادر جوفية وحفائر مع الحصار وقطع خطوط الإمداد البرميل وصل أرقام فلكية الأسر بقت تتشايل الموية بالكارو من مسافات بعيدة الموية المالحة بقت رفاهية…
▪️انهيار الصحة: المستشفى الرئيسي شغال بأقل من 30% من طاقته مافي أدوية مزمنة مافي لوازم علاج كاملة
▪️الإصابات بالمسيرات بتتحول لنزيف حتى الموت عشان مافي كل تفاصيل المعونات الطبية
.
▪️مسيرات الجنجويد: دي براها قصة المواطن بقى ينوم ويصحى على صوت الزنانة المسيرة بتضرب السوق بتضرب تنكر الموية بتضرب أي تجمع الهدف واضح ( تطفيش الناس وكسر صمودهم ) …
▪️لازم كلنا نقيف مع الأبيض—
▪️رمزية المدينة: الأبيض ما مدينة ساي دي حاضرة كردفان ومركز تجارة الصمغ والثروة الحيوانية وسقوطها معنوياً يعني سقوط نص السودان.
▪️صمود أهلها: رغم الحصار والجوع والمسيرات السوق لسه فاتح والمدارس الأهلية شغالة والناس بتتكاتف الحمدلله
لكن لو وقعوا ديل تاني منو حيقيف؟
▪️الواجب الأخلاقي: ما ممكن نخلي أهلنا يموتوا عطش وتحت المسيرات ونحنا نتفرج الساكت عن الحق شيطان أخرس لازم نقيف معاهم على المستوى الشعبي نعمل مثلاً (نفير الأبيض )
▪️قوافل الموية: أي تنكر موية نشوفه بكلف كم ان شاء الله نعمل شير نبعد تجار الأزمات اللي ببيعوا البرميل تقريباً بـ20 ألف لازم يتفضحوا بالأسماء…
▪️ نوصلهم الدواء: أبسط الحاجات: بندول، فلاجيل، دربات، شاش، بنسلين. دي بتفرق بين الحياة والموت ممكن تتجمع من كل ولاية.
▪️الإعلام: كل زول يكتب يصور و ينشر عن الأبيض خلي الهاشتاق #أنقذوا_الأبيض يبقى ترند الحصار بتكسر لما العالم يسمع.
▪️على المستوى الرسمي – بنناشد الدولة ان تتحرك عسكرياً
لفتح الطريق: معركة تحرير طريق ( بارا – الأبيض ) دي معركة حياة أو موت بدون الطريق دا أي إغاثة حتكون نقطة في بحر.
▪️على المستوى الفردي أنا وأنت
التبرع: لو جنيه واحد في مبادرات شغالة زي (نفير كردفان )
و ( أبناء الأبيض بالخارج ) نفتش عليهم.
▪️رفع الصوت عالياً ذكروا المسؤولين النائمين ديل أكتب لاعضاء مجلس سيادة و لوزير الصحة ولأي زول مسؤول خلي ملف الأبيض في وشهم ع طول …
وعايزة اقول اخيراً لأهلنا في الأبيض صبركم دا ما ح يروح ساي التاريخ شايف والله شايف والشعب شايف ووضعكم تحت المسيرات ما ضعف دي قمة البطولة انتو هسي خط الدفاع الأول عن السودان كله …
( الأبيض محروسة بالجيش والقوات المساندة وبأهلها ومنصورين بإذن الله )
حياكم الله ✌️
عائشة الماجدي
