عائشة الماجدي تكتب : التوقيت خانك يا تمبور
▪️يا مصطفي يا تمبور بالله عليك في عز ما البلد دي مقطوعة فيها الكهرباء والموية وربع البلد واقع في يد العدو والناس قاعدة في حراق الروح دي كلها تجي انت في التوقيت دا بالضبط وتطلع لينا بمبادرة تفويض شخص للحكم كأنو الناس قاعدة رايقة ومبسوطة ومنتظرة بس منو يجي يقول ليها وقعوا هنا عشان نفوض الزول الفلاني …
▪️طيب بالله عليك انت متخيل الزول العطشان والزهجان والمسخن دا حيقول ليك حاضر ويصفق ليك يا أخوي لو عايز تطلب من زول حاجة اختار الوقت المناسب البكون فيه مزاجه رايق وأموره ماشة ما تجيه وهو جيبه فاضي وبيته مٌظلم وما عنده موية عطشان وحالته بالبلاء وتقوليه ارح نفوض !!
▪️بعدين يا تمبور انت قائد حركة مسلحة يعني مكانك الطبيعي الميدان كتف بكتف مع الجيش ما المنابر والبيانات وشغلة التفويض دي خليها لناس السياسة الشغلتهم الكلام نحنا هسي عايزين الريس دا يجيب لينا الموية والكهرباء ويحرر الأرض بعد داك ما محتاج لتفويض من زول الشعب براه بوافق تلقائياً ..
▪️لكن يا تمبور انت تجي هسي في الظرف دا وتفتح الموضوع دا انت كدا ما بتفوض انت بتأجج الناس زيادة وبتزيد الطين بلة فبالله عليك نجض شغلتك كقائد حركة مع الجيش أول وبعدين فوض…
( تمبور دا صنف من البشر مختلف غايتو )
وبس …
