ْ *مقتطفات الجمعة*
مع الدفاتر القديمة
*** شخص واحد باسمه وصورته .. يتولى بالدولة عدد من الوظائف وكأن ( ما فيك يا دنيا إلا أنا ) وكأن الدولة لم تنجب غيره ( مشروع ) تصر دولتنا على التمسك به ( والعرض مستمر )
*** بالهلال الأعظم ( متسع ) لفرحة المريخاب الغائب فريقهم من ( الظهور الخارجي ) .. بالهلال الأعظم ( مساحة ) للشامتين ( وأرضية ) للمشفقين بالهلال ( أركان للنقاش ) لعافية الكرة السودانية تحتاج ( لجدية النقاش ) وكفى
*** قل للشامتين بنا أفيقوا
سيلقى الشامتون
كما لقينا
*** تشكر وزارة الطاقة على ( انجازاتها ) تشكر وهي تصدر بينات توضح أسباب انقطاع التيار الكهربائي بعد ( يومين تلاتة ) على انقطاعه
*** في حلتنا حرامي ( ورع .. تقي ) يخلع حذاءه خارج المسجد ويصلي مع المصلين وبعدها ( يلبس ) شيطانه ويسرق أحذيتهم
*** تركنا السكة الحديد مع ( سيرتها الأولى ) واسمحوا لنا بالسؤال عن مطار عطبرة ( وقومة وقعدة ) واجتماعات ونفرات ( وخطب حماسية ) دعونا نسأل هل وصلت المحصلة الصفر
( ولا لسه )
*** ألو .. ألو .. ألو يا بت أحمد ارفعي صوتك .. ألو ألو يا بت أحمد الشبكة كعبة .. سامعاني ولا ما سامعاني كلو كلو .. خلاص العفو والعافية
بت أحمد ربنا يحغظك ويملأ جوفك صحة وعافية
*** في مرافقة سابقة لي مع الهلال لمدني وأنا باستقبال فندق أمبريال لفتني شاب من كتفي وبعد سلام فاتر أشار إلى امرأة ( متخفية ) في آخر الصالة وقال لي عليك الله ما تكلم زول أنا عرست تاني قلت له منفعلاً أنا ما بعرف غير اسمك الأول وما عارفك ساكن وين ولا أهلك منو ولا عندي شغلة بيك وواضح إنك زول جبان وخواف ورجافة ورجفتك دي الحتكشفك .. بعد أيام قليلة قابلني صدفة وقال : والله العظيم زي ما قلت رجفتي وكبكبتي كشفتني … مرت السنوات وقبل يومين قابلني في مناسبة سعيدة بالقاهرة ومعه زوجته ولا أدري إن كانت الأولى أم الثانية المهم قدمني إليها
وبالتفاصيل ( حكى لها ما حكيت )
*** الصديق العزيز الفنان نجم الدين الفاضل رئيس اتحاد المهن الموسيقية طالبتكم ومرة أخرى أطالب ببطاقة اتحاد الفنانين التي منحها لي والفريق إبراهيم احمد عبد الكريم والرائد زين العابدين والصحفي ميرغني البكري .. العميد أحمد المصطفى في دورة رئاسته الثانية لاتحاد الفنانين
فهلا تكرمتم بتجديدها ؟؟ ياريت وياريت بصوت الرائعة مكارم بشير
*** أتعجب للسادة المريخاب وهم يلوكون ( الحكايات القديمة ) .. حكايات قبل أن ( يحمم ) ميسي الطفل لامين جمال بأكثر من عشرين سنة .. ويسقط عجبي هذا ومقولة تقول : الخواجة لمن يفلس يفتش دفاترو القديمة .. عموماً خليكم كده ( مع الدفاتر القديمة )
*** لو لاقتك أو وقعت في عينك دراسة من جامعات أوروبية أو أمريكية ( رفعت معنوياتك ) تأكد تماماً أنني أنا صاحب هذه الدراسة ( وأنا منو ) ما مهم تعرف
*** اللهم ارحم والدينا وجميع موتانا واشف مرضانا وعاف مبتلانا وأصلح حالنا وحال بلدنا وأعدنا إليه وأعده إلينا آمناً مطمئناً ..
جمعة مباركة وكل جمعة وانتو طيبين
عبدالمنعم شجرابي ..
