عبدالمنعم شجرابي يكتب: الهلال وبس
*** مدرب الهلال الروماني اُستقبِل بترحاب كبير وجرت ( سودنته ) بسرعه فائقة .. لبس الجلابية ( وحكر ) الطاقية ( وضرب ) القراصة والكسرة ( وشبع ) تقلية ونعيمية وسمع الجميل عن سيرته ببلده والإمارات والسعودية ( ووروه ) الهلال شنو وعموماً قدّم الأسياد السبت وفي انتظار الأحد وإلا سيعرف الخواجة
( الطفى النور منو )
*** ولد ( من بطن ) الهلال وكما ( حفر ) اسمه لاعباً ( نقشه ) مدرباً وخالد بخيت المدرب العام ارتدى بدلة المدير الفني ( ودق صدرو ) وفي بطولة النخبة ( شال الهم بالجملة ) وفاز بالبطولة ولا مدرب قبله في السنوات الأخيرة جندل المريخ
( بتلت الدستة )
ود بخيت ( سعيد وبخيت ) يبدأ ( ولاية جديدة ) مع المدرب الجديد وبشخصية أقوى ويا خالد
( بطنن جابتك والله ما بتندم )
*** بلا نقطة ولا شولة ولا فقرة وبصفحة جديدة يدخل الأزرق إلى تدريب الروماني أوريليان ريجيكامب وفي إدارة الكرة يبقى بلا ( حذف ) ولا ( إضافة ) عبد المهين الأمين وياهو ( زولنا ذاتو ) الكشاف الذي أضاف للهلال النجوم ( وياهو ذاتو ) المعد النفسي والمعد الاجتماعي
( ياهو عبد المهمين ) وكفى
*** ويعجبنى العليقي ( سيد الفيلم ) وهو يمسك في الإيجابي فقط ومن السالب ( يسد أضان بي طينة وأضان بي عجينة ) ويضرب ( الطناش )
ومتحزم ومتلزم
( يشوف شغلو )
وشغل العليقي
( صنف تاني ) وفرز أول
( وياهو ده الشغل )
*** بكشوفات الهلال وتشكيلته أولاد ( أمبارح ) وأولاد ( الليلة ) وأولاد ( بكرة ) وهكذا الفرق الكبيرة ( تؤمن ) حاضرها ( وتصنع ) مستقبلها
( والكبير كبير )
*** العالم يعرف كرة القدم بخطوطها الثلاثة الدفاع والوسط والهجوم
والجديد البرازيليون أخرجوا حراسة المرمى من الدفاع وجعلوه ( خط رابع ) قائم بذاته ولا غرابة أن ينتهج الهلال نفس النهج والهلال
( برازيل أفريقيا )
*** محترفو الهلال الأجانب الذين لعبوا بالدامر وعطبرة وبربر ( محظوظين ) لأنهم عرفوا عن قرب ولأول مرة ( جغرافيا ) الهلال ومناطقه المقفولة ( وغير محظوظين ) لأنهم لم يلعبون أمام الشعب الأزرق بالجوهرة الزرقاء بأمدرمان
( عاصمة جمهورية الهلال )
( والجايات أكتر من الرايحات )
*** دار السلام ( المقر الأفريقي ) للهلال ( حققت أحلامها ) وهلالنا يحلها ويهبطها بكامل هيبته ( الدار سلاميون ) هلالاب حتى النخاع
( وفي حب يا اخوانا أكتر من كده )
*** شكراً جزيلاً وجميلاً ونبيلاً وأنيقاً ووسيماً للاعبين الذين غادروا كشوفات الهلال
شكراً طويلاً وعريضاً وعميقاً لهم ( فسوء الحظ ) كان أكبر من ( حسن اختيارهم ) لارتداء الشعار الأزرق
الأمنيات الطيبة لهم بالنجاح بفرق أخرى
ولا عليهم
( المجنونة عاوزة كده )
*** حزر فزر كم كلفت تعاقدات الهلال؟ وكم يدفع الهلال شهرياً لطاقمه الفني ومحترفيه الوطنيين والأجانب
( اتخيل الرقم كم ) ؟!!
واللهم اكفِ الهلال شر العيون وشر حاسد اذا حسد
عبدالمنعم شجرابي ..
